رویداد خبري آژانس په افغانستان کې لومړنۍ دیجټلي خبري آژانس
کندهار ښار دریېمه ناحیه کې د چاودنې له امله ۲۲ تنو ته مرګ ژوبله اوښتې، د کندهار امنیتي چارواکي پیښه مني او وايي په پيښه کې دوه تنه ملکي کسان وژل شوي او د پولیسو په ګډون ۲۰ نور ټپیان دي.
د کندهار ولایت امنیه قوماندانۍ ویاند جمال ناصر بارکزی وايي پیښه تیره شپه شاو خوا ۷ نیمې بجې د کندهار ښار درېیمې ناحیې په چوک کې رامنځته شوه.
جمال ناصر وویل چاودیدونکي توکي په یو موټر سایکل کې ځای پر ځای شوي و.
نوموړی وايي چاودنه د پولیسو یوې پوستې ته نږدې شوې چې پکې د درېیمې حوزې معاون او یو پولیس هم ټپیان شوي دي.
بارکزی زیاتوي د حوزې معاون روغتیايي وضیعت د اندیښنې وړ دی.
د پیښې مسولیت تر اوسه چا پر غاړه نه ده اخیستې.
