رویداد خبري آژانس په افغانستان کې لومړنۍ دیجټلي خبري آژانس
د پاکستان د پوځ عامه اړيکو څانګې د يوې خبرپاڼې په خپرولو سره خبر ورکړی، چې د دې هېواد د ګډو ځواکونو کميټې د افغانستان او دغه راز د ډيورنډ کرښې په اوږدو کې د امنيتي وضعيت ارزولو په تړاو غونډه کړې ده.
د خبرپاڼې له مخې، په دې غونډه کې د پوځ لوی درستز قمر جاوېد باجوه، د ګډو ځواکونو د کميټې مشر نديم رضا، د هوايي او سمندري ځواکونو قومندانانو برخه لرله.
د غونډې پرمهال د پاکستان پوځي چارواکو د افغانستان پر امنيتي وضعيت غږېدلی او دغلته يې د امنيت ښهوالی د پاکستان او نورو هېوادونو په ګټه بللی دی.
د دې ترڅنګ د پاکستان پوځي چارواکو د ډيورنډ کرښې پورې غاړې ته د امنيتي وضعيت پر خرابوالي اندېښنه ښودلې او ويلي يې دي، چې د وضعيت کابو کولو لپاره به کوټلي ګامونه پورته کړي.
دوی زياته کړې، چې دا مهال ډيورنډ کرښې ته څېرمه په قبايلي سيمو کې امنيتي وضعيت د تېر په پرتله ډېر خراب شوی او په خبره يې پوځ چمتو دی چې د وضعيت ښه کولو لپاره له ممکنه لارو چارو ګټه پورته کړي.
په داسې حال کې چې تحريک طالبان پاکستان د پاکستان له حکومت سره تر نامالومې مودې اوربند اعلان کړی، خو پر دې سربېره هم په دې وروستيو کې په بلوچستان، پښتونخوا او قبايلي سيمو کې پر پاکستاني پوځيانو خونړي بريدونه شوي.
