رویداد خبري آژانس په افغانستان کې لومړنۍ دیجټلي خبري آژانس
چين د امريکا ولسمشر جوبايډن پر هغې پرېکړې نيوکې کړې او غبرګون يې پرې ښودلی چې د يوه اجرائيوي حکم په ترڅ کې يې د افغاناستان کنګل کړې شتمنۍ په اړه کړې ده.
د چين بهرنيو چارو وزارت وياندې هوا چونينګ په خپل ټوېټر کې په دې اړه ويلي، د سپټمبر ۱۱مې قربانيانو په ګټه د افغانستان شتمنۍ کارول، په ښکاره توګه د افغانانو يادې شتمنۍ غارت کولو په مانا دي.
نوموړې زياته کړې چې د امريکا د نړۍ يوه شتمن هېواد په توګه، د افغانستان په څېر د بېوزله هېواد شتمني غارت کوي. د هوا چونينګ په خبره، د افغانستان شتمي د دغه هېواد پر خلکو پورې تړاو لري او کنټرول يې هم بايد د همدوی په لاس کې وي.
دا په داسې حال کې ده چې د امريکا ولسمشر جوبايډن د يوه اجرائيوي حکم له مخې، د افغانستان ۷ مېليارد ډالر ګنکل پانګې د ازادولو لارښوونه کړې. د ياد حکم له مخې، د يادو ۷ مېليارد ډالرو نېمايې هغه په امريکا د سپټمبر ۱۱مې پېښې د قربيانونو کورنيو ته د غرامت په توګه ځانګړي کړي دي.
