رویداد خبري آژانس په افغانستان کې لومړنۍ دیجټلي خبري آژانس
له ځنډ وروسته هغه ښځينه فعالانې چې موده وړاندې په کابل کې بېدرکه شوې وې، بېرته له زندان ازادې شوي او خپلو کورنيو ته سپارل شوي دي.
که څه هم اسلامي امارت چارواکو په دې اړه څه نه دي ويلي؛ خو په افغانستان کې د ملګرو ملتونو سياسي استازولۍ يا يوناما پرون ماښام د (سلواغې په ۲۴مه) تائيد کړه چې يادې فعالانې خوشې شوي دي.
يوناما د پروانې ابراهيمخېل چې څو ورځې وړاندې خوشې شوې، تمنا زريابي پرياني، زهرا محمدي او مرسل عيار له خوشې کېدو هرکلی کړی او زياته کړې يې ده چې ملګري ملتونه په افغانستان کې له بشری حقونو برابر ملاتړ کوي.
د يادو ښځينه فعالانو کورنيو هم له رسنيو په خبرو کې له زندان څخه د دوی بېرته ازادېدل تائيد کړي؛ خو وايي چې لا هم تر فشار لاندې دي او د نيول کېدو قضيې په اړه له خپلو کورنيو سره مالومات نه شريک کوي.
