رویداد خبري آژانس په افغانستان کې لومړنۍ دیجټلي خبري آژانس
مخکينی مرستيال ولسمشر امرالله صالح چې يو وار بيا يې په ټولنيزو رسنيو کې فعاليت پيل کړی وايي، په افغانستان کې د طالبانو په مشرۍ د حکومت د بقا دوام ممکن نه دی.
نوموړي نن تازه په خپل ټوېټر کې د طالبانو حکومت تروريستي بللی او ويلي يې دي، چې پاکستان ته له طالبانو په ملاتړ سره په افغانستان کې د ورته يوه حکومت رامنځته کېدل د مختلفو دليلونو پر بنسټ مهم و.
صالح دغه راز زياته کړې، که څه هم د پاکستان پوځ هڅه کوي چې د طالبانو په مشرۍ د حکومت پايښت يقيني کړي خو په خبره يې ورته يو حکومت پايښت نه شي موندلی او دا چاره ښايي دې ډلې ته ډېره سخته وي.
نوموړي پرون هم د (تلې په ۳۰مه) هم د افغانستان وضعيت او د طالبانو له لوري د واک نيولو په اړه څرګندونې درلودې، خو طالب چارواکو تر اوسه د نوموړي پرونيو او نننيو څرګندونو په اړه نظر نه دی څرکند کړی.
