رویداد خبري آژانس په افغانستان کې لومړنۍ دیجټلي خبري آژانس
د افغانستان لپاره د ملګرو ملتونو د مرستندویه پلاوي (یوناما) اعلان کړی، چې افغانستان لا هم د ناچاودېدونکو توکو له امله د تلفاتو له پلوه د هغو هېوادونو له ډلې دی چې ډېر قربانیان لري، او هره میاشت پکې له پنځوسو ډېر کسان وژل کېږي یا ټپیانېږي.
د یوناما د ماینپاکۍ د څانګې مشر نېک پاونډ له خبریالانو سره په خبرو کې ویلي چې دا شمېرې دا مانا لري چې په افغانستان کې هره ورځ یو کس د ناچاودېدونکو توکو له امله وژل کېږي یا ټپي کېږي، چې ۸۰ سلنه یې ماشومان دي.
د نېک پاونډ په وینا، «۹۰ سلنه دا تلفات د هغو ناچاودېدونکو توکو له امله دي چې د څلورو لسیزو جګړو وروسته لا هم په ځمکه کې پاتې دي. ډېری قربانیان هغه ماشومان دي چې دا توکي پیدا کوي او بيا ورسره لوبې کوي، یا د څارويو د څرولو پر مهال ورسره مخ کېږي.»
د یوناما چارواکي همداراز ويلي، چې لا هم د افغانستان زرګونه کیلومتره مربع خاوره د ناچاودېدونکو توکو له امله ککړه ده.
د هغه په خبره، شاوخوا درې میلیونه خلک، ۸۰۰ ښوونیز مرکزونه او ۲۰۰ روغتیايي مرکزونه له هغو سیمو یو کیلومتر واټن کې موقعیت لري چې په ناچاودېدونکو توکو ککړې دي.
پاونډ د خپلو خبرو په یوه برخه کې د ماینپاکۍ په برخه کې د مرستو کمېدو ته په اشارې سره وویل: «بشري مرستې افغانستان ته کمې شوې دي، حکومت په رسمیت نه دی پېژندل شوی، او د ماینپاکانو شمېر چې په ۲۰۱۱ کال کې ۱۵ زرو ته رسېده، اوس شاوخوا ۱۳۰۰ کسانو ته راکم شوی دی.»
د کډوالو بېرته راستنېدل، زلزلې او له پاکستان سره شخړې هم د افغانانو پر وړاندې له سترو ننګونو بلل شوي، خو ټینګار شوی چې لا هم د ماینپاکۍ په برخه کې په ملي او نړیواله کچه پراخ فرصتونه او تجربې شته.
نوموړي چارواکي زیاته کړې چې که نړیوالې مرستې د ماینپاکۍ برخې ته زیاتې شي، د افغانستان خاوره به له ماینونو پاکه شي او خلک به وکولای شي بېرته عادي ژوند ته ستانه شي.
