رویداد خبري آژانس په افغانستان کې لومړنۍ دیجټلي خبري آژانس
د ډونالډ ټرمپ اداره په پام کې لري چې د شاوخوا ۲۰۰ زره بهرنیانو د سوداګرۍ او سیاحت B1 او B2 ویزې لغوه کړي؛ دا هغه کسان دي چې امریکا ته د لنډمهاله سفر لپاره تللي، خو وروسته یې د پناه غوښتنه کړې یا یې د پناه غوښتنې بهیر روان دی.
اسوشېټډ پرېس د امریکا د بهرنیو چارو وزارت د اسنادو او دوو امریکايي چارواکو له قوله راپور ورکړی چې د ۲۰۱۶ او ۲۰۲۶ کلونو ترمنځ صادرې شوې B1 او B2 ویزې به د دې طرحې له مخې اغېزمنې شي.
د امريکا د بهرنیو چارو وزارت وايي، دغه بهیر به له کورني امنیت وزارت سره په همغږۍ ترسره شي.
د امریکا د بهرنیو چارو وزارت ویاند ټامي پیګوټ ویلي، حکومت غواړي هغه کسان وپېژني او ویزې یې لغوه کړي چې د لنډمهاله مېلمنو په توګه امریکا ته تللي، خو وروسته یې د دایمي پاتې کېدو لپاره د پناه غوښتنه کړې ده.
