رویداد خبري آژانس په افغانستان کې لومړنۍ دیجټلي خبري آژانس
د روغتیا نړیوال سازمان وایي، د تېرې مارچ میاشتې پر مهال په افغانستان کې د یو شمېر ناروغیو په کچه کې بدلون راغلی دی. د دغه سازمان د موندنو له مخې، د سینهبغل پېښې ۳۳.۱ سلنه کمې شوې دي، خو ملاریا بیا ۲۵ سلنه زیاته شوې ده. همداراز، د کانګو ناروغۍ له امله د مړینې کچه لا هم ۱۰.۲ سلنه ده.
راپور زیاتوي چې د نس ناستې ۶٬۳۰۸ نوې پېښې ثبت شوې دي چې د فبرورۍ په پرتله ۵.۷ سلنه زیاتوالی ښيي، خو د ډینګي تبې مشکوکې پېښې چې ۱۱۵ دي، ۳۳.۵ سلنه راکمې شوې دي. سرخکان هم د ۲٬۳۹۵ پېښو او ۱۱ مړینو سره ۸ سلنه کمښت ښيي.
یاد سازمان وایي چې د خپلو وروستیو اقداماتو په ترڅ کې یې په ټول هېواد کې څه باندې ۲۰۰ د روغتیايي خدمتونو بستې وېشلې دي، چې له ۸۱۰ زرو څخه زیاتو کسانو ته رسېدلې دي. په راپور کې دا هم راغلي چې د څه باندې ۷ زره راستنېدونکو کډوالو د معایناتو پایلې ښيي چې د هغوی ترمنځ ځینې ناروغۍ، لکه کرونا او ډینګي، شتون لري.
د راپور په بله برخه کې ویل شوي چې وروستیو سېلابونو زرګونه کورنۍ بېځایه کړې، لسګونه کسان یې مړه کړي او په لږ تر لږه ۱۰ روغتیايي مرکزونو کې یې د درملنې خدمتونه ګډوډ کړي دي. سره له دې، دغه سازمان په افغانستان کې د یوې پراخې روغتیايي شبکې د جوړېدو خبر هم ورکړی، چې پکې ۱۰۶ روغتیايي مرکزونه، تخصصي روغتونونه، د روږدو کسانو د درملنې مرکزونه او د رواني روغتیا خدمتونه شامل دي.
