رویداد خبري آژانس په افغانستان کې لومړنۍ دیجټلي خبري آژانس
په افغانستان کې د ملګرو ملتونو سياسي استازولۍ يا يوناما مشرې ډيبور لاينز پرون يکشنبه (غبرګولي په لومړۍ) په کندهار کې د ميرمنو او رسنيو له يو شمېر استازو سره ليدلي او ورسره يې د افغانستان پر اوسني وضعيت خبرې کړي دي.
ميرمن لاينز د دې ليدنو پرمهال په افغانستان کې د ټولګډونه دولت او حکومت رامنځته کول او دغه راز په دې هېواد کې د ملي پخلاينې د يوه ريښتينې بهير پيلول اړين بللي دي.
نوموړې د افغانانو د حقونو خونديتوب او په ځانګړې توګه ښوونځيو ته د هر عمر لرونکو نجونو د لاسرسي له لارې، د کورني مشروعيت پر رامنځته کولو هم ټينګار کړی دی.
ډيبورالاينز ياد مسايل د افغانستان لپاره مهم بللي او زياته کړې يې ده چې مسوولان دې ورته په جدي توګه پاملرنه وکړي.
له دې سره هممهال پرون يکشنبه د بهرنيو چارو وزارت سياسي معين شېرمحمد عباس ستانکزي هم پر اسلامي امارت د يو لړ نيوکو په ترڅ کې، نجونو ته د زدهکړو زمينې د برابرولو غوښتنه وکړه.
نوموړي زياته کړه، که څه هم په افغانستان کې زدهکړې شته؛ خو له دې کبله برابرې نه دي چې نجونې ترې منعه شوي دي.
