رویداد خبري آژانس په افغانستان کې لومړنۍ دیجټلي خبري آژانس
بریتانیه وايي، افغانستان له وسله والو طالبانو سره د روغې جوړې له لارې د روان کړکېچ د پای ته رسولو لپاره تاریخي فرصت لري.
په کابل کې د یاد هیواد له سفارت څخه نن سې شنبه سپټمبر ۱(وږې۱۱) په خپره شوې خبرپاڼه کې ویل شوي چې یاد فرصت ته د رسېدو لپاره باید تاوتریخوالی او هدفي وژنې بندې شي.
په دې خپرپاڼه کې له دواړو لورو غوښتل شوي چې د بین الافغاني خبرو پر پيلولو باندې د موافقې له لارې سولې ته خپله ژمنتیا وښيي.
اعلامیه زیاتوي:”افغانستان یو تاریخي فرصت لري چې تر څو له طالبانو سره د جوړ جاړي له لارې روانې شخړې ته د پای ټکی کیږدي، دې فرصت ته د رسېدو په موخه تاوتریخوالی او هدفي وژنې هرو مرو باید پای ته ورسیږي او ټولې خواوې باید بېله کومه ځنډه بین الافغاني خبرو اترو د پيل سره د موافقې له لارې شخړو هوارولو او سولې ته د رسېدو لپاره خپل ژمنتیا وښيي.”
په کابل کې د بریتانیې سفارت په کابل او یو شمېر نورو ولایتونو کې د تاوتریخوالي او هدفي بریدونو زیاتېدو په اړه اندېښنه ښودلې ده او هغه یې غندلي دي.
یاد سفارت د افغانستان د خلکو، مشرانو، امنیتي ځواکونو، مدني ټولنو مشرانو د زړورتیا ستایلې چې په وینا یې سولې ته د رسېدو په موخه د جمهوریت د ارزښتونو د دفاع لپاره له ګواښونو سره مخ دي.
بریتانیې ویلي چې له ترهګرۍ سره د مبارزې او سولې ته د رسېدو لپاره به د افغانستان د خلکو ترڅنګ ولاړه وي.
یاد هیواد پر داسې مهال په افغانستان کې د تاوتریخوالي زیاتېدو په اړه اندېښنه ښودلې چې نن سې شنبه په پکتیا کې د طالبانو موټر بم برید درې سرتېري ووژل او پنځه نور یې ټپیان کړل.
بلخوا د افغانستان د ملي دفاع وزارت هم کندهار او فاریاب کې د لسګونو وسله والو طالبانو د مرګ ژوبلې خبر ورکړی دی.
په هدفي وژنو کې تر ټولو وروستۍ یې د تېرې یکشنبې په ماښام د کابل په پنځمه امنیتي حوزه کې په مشرانو جرګه کې د زابل ولایت د پخواني سناتور محمد حسن هوتک ترور و.
د کابل د امنیې قوماندانۍ په وینا نوموړی خپل کور ته نژدې د وسله والو په برید کې وژل شوی دی.
چارواکو هغه مهال د څېړنو خبر ورکړ، خو تر دا مهاله یې پایلې نه دي اعلان کړي.د نوموړي وژلو مسؤلیت هم کومې وسله والې په غاړه نه دی اخیستی.
