خبرگزاری رویداد اولین خبرگزاری دیجیتلی در افغانستان
کرن‌دیکر، کاردار سفارت آمریکا به افغانستان در رشته ای تویتی گفته است که برای شرکت به دهمین نشست امنیتی هرات به دوشنبه پایتخت تاجیکستان رفته است.
خانم دیکر صبح امروز (سه‌شنبه، ۸ قوس) در رشته توییتی نگاشته است که این نشست فرصت خوبی برای تبادله نظر در مورد وضعیت افغانستان با نمایندگان افغانستان، تاجیکستان و کشورهای منطقه است.
دهمین نشست امنیتی هرات زیر عنوان «نظام سیاسی همه‌شمول: الگوها و نقشه راه» امروز در دوشنبه، پایتخت تاجیکستان برگزار می شود. در این نشست شماری از سیاست‌مداران پیشین افغانستان، نماینده‌گان جامعه مدنی، شخصیت‌های اکادمیک، نماینده‌گان رسانه‌ها، دیپلماتان و نماینده‌گان نهادهای غیردولتی از اتحادیه اروپا، امریکا، پاکستان، هندوستان و تاجیکستان شرکت خواهند کرد.
گفتنی است که این نشست برای دو روز با میزبانی انستیتوت مطالعات استراتژیک افغانستان برگزار می‌شود.
