رویداد خبري آژانس په افغانستان کې لومړنۍ دیجټلي خبري آژانس
په ننګرهار ولایت کې ځايي چارواکي وايي، د دغه ولایت په مرکز جلال اباد کې د انعکاس تلوېزون خبریاله ملاله میوند نن سهار د پنجشنبې ورځ دفتر ته د تلو پر مهال ووژل شوه.
د ننګرهار د والي ویاند عطاالله خوګیاڼي په خپله فېسبوک پاڼه لیکلي، ملاله میوند د ښار د عربانو ګلايي سیمه کې له کور دفتر ته تله چې ووژل شوه:” له بده مرغه نن سهار ۷:۱۰ بجې ملاله میوند چې له کور د دندې لور ته تله د ناپېژاندو کسانو په ډزو له خپل موټر چلوونکي سره یو ځای په شهادت رسول شوې ده.”
د نوموړي په خبره، ملاله میوند پر خبریالۍ سربېره مدني فعاله هم وه.
ملاله میوند د کرېکټ مبصره هم وه او د افغان کرېکټ لوبډلې پر سیالیو به یې تبصرې کولې.
بل لوري ته د افغانستان د کرکټ ملي لوبدلې پخوانی لوبغاړی کریم صادق د نوموړې په وژل کېدو خواشیني څرګنده کړې ده. کریم صادق په خپله فېسبوک پاڼه لیکلي:” لیکلو لپاره هیڅ هم نلرم دعا کوم چی الله دی د شهادت لوړ مقام درته نصیب کړی او کورنۍ ته دی جمیل صبر غواړم.”
نوموړې تېره شپږیزه کې لومړنۍ ښځینه خبریاله وه چې د لوبو ډګر کې یې نندارچیانو ته پر لوبو تبصرې کولې.
افغانستان د خبریالانو لپاره په نړۍ کې یو خطرناک او ناامن هېواد دی.
د ملاله میوند وژل کېدو سره دا په څه باندې یوه میاشت کې د رسنیز ډګر دریم کس دی چې وژل کېږي.
د تېر نومبر پر اومه پخوانی خبریال یما سیاوش په کابل کې ووژل شو.
د تېر نومبر پر ۱۲ د هلمند مرکز لښکرګا کې خبریال الیاس داعي ووژل شو.
