رویداد خبري آژانس په افغانستان کې لومړنۍ دیجټلي خبري آژانس
د ننګرهار ولایت دکرنې اوبولګولو او مالدارۍ ریاست چارواکي وایي، چې په دې ولایت کې د کرېلو او ترایانو چېله یې سیستم ١٠٠ ننداریزې کروندې جوړ شوې دي.
د يادې پروژې ولایتي مسوول انجنير حمید الله نظیر وايي، دوی په درو ولسواليو بهسود، کامه او کوزکونړ کې د ننداریزو کروندو په دننه کې منځني کرنه هم ترسره کړې ده، چې ښه او باکیفیته حاصل ترې بزګرانو اخیستي دي.
نظیر وویل، چې دیادو کروندو لپاره یې د کیمیاوي سرو، اصلاح شوې تخمونو او کیمیاوي درملو ترڅنګ اړین توکي لکه دباڼس پایې، جالۍ، کېبل، بیلچه، لاسي کراچۍ او د درملو شېندلو پمپونه د کروندو د ښې پالنې او نظارت په موخه اړوندو بزګرانو ته ورکړي دي.
د ننګرهار دکرنې ریاست چارواکو په وینا تېر کال هم یادې پروژې ١٠٠ ننداریزې کروندې کرلې وې ، چې ٤٨٣.٩ مټریک ټنه حاصل څخه يې پنځه نیم مېلیونه افغانۍ عواید ترلاسه شوې وه.
دغه راز ياده پروژه د چېله یې سیستم او ګډې یا منځني کرنې په برخه کې د مېرمنو په ګډون ١٠٠ تنو ته د کرلو، اوبولګولو وختونو پیژندل، سرې ورکول او حاصل ټولولو په برخه کې روزنه هم ورکړې ده.
