رویداد خبري آژانس په افغانستان کې لومړنۍ دیجټلي خبري آژانس
له افغانستان څخه د امریکايي ځواکونو د وتلو د پنځم کال پوره کېدو په درشل کې، د کډوالو د حقوقي مرستې نړیوال سازمان «IRAP» وايي، لا هم ګڼ افغان کډوال او د امریکا پخواني همکاران له دغه هېواده بهر له نامعلومه برخليک سره مخ دي
دغه سازمان وايي، د ډونالډ ټرمپ ادارې د سفر بندیز او د کډوالۍ ویزو د صادرولو ځنډ، د افغانانو او په ځانګړي ډول د ځانګړې کډوالۍ ویزې (SIV) غوښتونکو، امریکا ته د انتقال بهیر له جدي خنډونو سره مخ کړی دی.
د IRAP په وینا، د امریکا د کډوالو د منلو بهیر هم محدود شوی او په روان مالي کال کې یوازې درې افغانان امریکا ته د کډوالو په توګه انتقال شوي دي.
دغه سازمان زیاتوي چې په امریکا کې هم ځینې افغانان د نیول کېدو او شړلو له خطر سره هم مخ دي.
د کډوالو د حقوقي مرستې نړیوال سازمان (IRAP) له امریکا کانګرس څخه غوښتي چې د افغان کډوالو او د امریکا د پخوانیو افغان همکارانو د ملاتړ لپاره اقدام وکړي او هغو افغانانو ته د امریکا د خوندي انتقال زمینه برابره کړي چې لا هم له هېواده بهر پاتې دي.
