رویداد خبري آژانس په افغانستان کې لومړنۍ دیجټلي خبري آژانس
د امریکا د روډ آیلنډ ایالت فدرالي قاضي جان مککانل د ټرمپ ادارې هغه پالیسۍ غیرقانوني بللې دي، چې د ۳۹ هېوادونو د وګړو د پناه غوښتنې، د کار جواز، شین کارت او تابعیت دوسیې یې ځنډولې وې.
مککانل د امریکا د تابعیت او کډوالۍ ادارې (USCIS) د وروستو پرېکړو سره په مخالفت کې ويلي، چې د افریقا، اسیا، لاتینې امریکا او منځني ختیځ د لسګونو هېوادونو وګړي په «نامعلوم حقوقي حالت» کې ساتل شوي.
نوموړي ویلي، دغو کډوالو ټول هغه قانوني بهیرونه بشپړ کړي، چې د امریکا کانګرس تصویب کړي او د تابعیت او کډوالۍ ادارې د مقرراتو له مخې نافذ شوي دي، خو بیا هم د دوی دوسیې له میاشتو راهیسې بېپرېکړې پاتې دي.
مککانل په خپله پرېکړه کې لیکلي، د دغو کسانو د دوسیو ځنډ د دوی د کومې تېروتنې له امله نه، بلکې یوازې د هغوی د زېږېدو له ځای سره تړاو لري.
دا دعوه د کډوالو د ملاتړ بنسټونو او د کارګرو د ټولنې له لوري د ۲۰۲۶ کال په مارچ میاشت کې ثبت شوې وه.
د مالوماتو له مخې، دغه محدودیتونه د ۲۰۲۵ کال په نومبر کې وروسته له هغه وضع شول، چې یوه افغان پناه غوښتونکی په واشنګټن کې د ملي ګارد پر دوو سرتېرو برید وکړ؛ چې په پايله کې یوې سرتېرې ژوند له لاسه ورکړ او بل ټپي شو.
