رویداد خبري آژانس په افغانستان کې لومړنۍ دیجټلي خبري آژانس
د راپورونو له مخې په ترکیه کې ولسمشریزو ټاکنو کې داسې معلومیږي چې اوسنی ولسمشر رجب طیب اردوغان او سیال یې کمال کلیچداراوغلو د پرون ورځې په رای ګیرۍ کې اکثریت نه دی ګټلی او له همدې کبله دویم پړاو ټاکنو کې به د دې هېواد ولسمشر وټاکل شي.
تر دې دمه ۹۹،۳۸ سلنه د رایو صندوقونه شمارل شوي چې پکې ښودل کیږي ۶۹ کلن اردوغان د خپل سیال څخه وړاندې دی خو بیا یې هم پنځوس جمعه یو اکثریت نه دی ګټلی.
په شمېرل شویو رایو کې اردوغان ۴۹.۴۲ او کلیچداراوغلو ۴۴.۹۵ په سلو کې رایې ګټلي دي.
په عین حال کې د ترکیې ولسمشر ادعا کړې چې د خپل سیال څخه په ښکاره توګه مخکې دی خو تر څنګ یې دا هم ویلي که ټاکنې دویم پړاو ته لاړې شي، دی چمتو دی.
اردوغان خپلو پلویانو ته په وینا کې دا هم ویلي چې واکمن محافظه کار ائتلاف یې په پارلمان کې اکثریت څوکۍ ګټلي دي.
د ترکیې په ټاکنو کې شاوخوا ۶۰ ملیونه وګړي رای ورکولو وړ وو، چې له دې څخه څه باندې ۵۵.۴ ملیونه وګړیو رایه ورکړې ده.
په ورته حال کې راپورونه ورکول کیږي، چې د ترکیې پارلماني ټاکنو پایلې، چې همهاله ولسمشریزو ټاکنو سره ترسره شوې، د رجب اردوغان په مشرۍ د عدالت او پرمختګ ګوند که څه هم لس څوکۍ له لاسه ورکړي دي، خو د نوموړي په مشرۍ د خلکو اتحاد د ترکې پارلمان له ۶۰۰ څوکیو څخه ۳۲۱ څوکۍ ګټلي دي.
