رویداد خبري آژانس په افغانستان کې لومړنۍ دیجټلي خبري آژانس
د کرکټ شل اووريز نړيوال جام د سياليو په دوام سره نن سېشنبه د (لړم په ۱۰مه) د افغانستان کرکټ ملي لوبډله د سرېلانکا لوبډلې پر وړاندې ميدان ته ښکته شوه.
افغان لوبډلې د لوبې پچې په ګټلو سره د توپ وهنې پرېکړه وکړه او په ټاکلو ۲۰ اوورونو کې يې د سرېلانکا سيالې لوبډلې ته د ۸ لوبغاړو په سوځېدو سره د ۱۴۵ منډو هدف کېښود.
د افغانستان لپاره رحمنالله ګربز ۲۸، عثمان غني ۲۷ او ابراهيم ځدراڼ د ۲۲ منډو په جوړولو سره له نورو لوبغاړو زياتې منډې وکړې. له دې سره مجيبالرحمن ځدراڼ د سرېلانکا ۲ لوبغاړي، رشيد خان او ګلبدين نايب يو-يو لوبغاړی وسوځول.
د لوبې په دويمه پاڼۍ کې د سرېلانکا لوبډلې بيا په ۱۹م اوور کې د ۴ لوبغاړو په سوځېدو سره ټاکلی هدف پوره کړ. د سرېلانکا لپاره دانانجايا ۶۶، کوسل مينډېس ۲۵ او چاريټ اسالانکا ۱۹ منډې جوړې کړې.
د نننۍ لوبې له بايللو سره افغان لوبډلې نيمه پايلوبې ته د تګ چانس له لاسه ورکړ او سرېلانکا بيا د نننۍ لوبې په ګټلو سره په نسبي توګه نيمه پايلوبې ته د وتلو هيلې تازه کړې.
سرېلانکا لوبډلې دوې لوبې بايللي او دوې يې ګټلي دي، خو افغانستان بيا د څلورو لوبو له ډلې دوې بايللي او دوې نورې يې د باران له امله ډراپ شوي دي، چې له يادو لوبو يې يوازې يو-يو پوانټ ترلاسه کړی دی.
