رویداد خبري آژانس په افغانستان کې لومړنۍ دیجټلي خبري آژانس
ټاکل شوې چې د روسيې ولسمشر ولاديمير پوتين نن سېشنبه د (چنګاښ په ۲۸مه) په يوه مهم سفر ايران ته لاړ شي.
نوموړی به د خپل دې سفر په ترڅ کې د ايران له مذهبي مشر اياتالله خامنهيي سره وګوري او له نوموړي سره به د روسيې او ايران ترمنځ د اړيکو او په سيمه کې د دواړو هېوادونو د همکاريو پر زياتولو وغږېږي.
د بهرنۍ پاليسۍ په برخه کې د ولسمشر پوتين سلاکار يوري اشکااوف پرون په مسکو کې رسنيو ته ويلي، چې له خامنهيي سره د پوتين ليدنه خورا مهمه ده.
نوموړي زياته کړې، چې روسيه او ايران د نړيوالو او سيمهييزو مسايلو په تړاو سره نږدې او ورته ليدلوری لري او له همدې کبله اړتيا ده چې دغه ليدلوري سره همغږي شي.
د دې ترڅنګ به ولسمشر پوتين په تهران کې د ترکيې له ولسمشر رجب طيب اردوغان سره هم وګوري. دوی دواړه به له اوکراين څخه د غنمو پر صادراتو او دغه راز په سوريې کې د ترکي ځواکونو له لوري پر راتلونکو احتمالي عملياتو خبرې وکړي.
روسيه له دې کبله چې په سوريه کې د بشرالاسد د حکومت ملاتړ کوي، په دې هېواد کې دننه د ترکيې د نظامي عملياتو مخالفه ده.
تهران ته د ولسمشر پوتين دا سفر په داسې حال کې دی، چې درې ورځې وړاندې د امريکا ولسمشر جوبايډن منځني ختيځ ته سفر درلود او د ياد سفر په ترڅ کې يې د ايران او روسيې په اړه مهم مسايل مطرح کړي دي.
