رویداد خبري آژانس په افغانستان کې لومړنۍ دیجټلي خبري آژانس
د ناټو سازمان يوه چارواکي رسنيو ته ويلي، چې سبا چهار شنبه د (وري په ۴مه) د اوکراين ولسمشر ولاديمير زلينسکي ته بلنه ورکړې، څو د ياد سازمان فوقالعاده غونډې ته وينا وکړي.
نوموړي زياته کړې، چې ولسمشر زلينسکي به د وېډيو کنفرانس له لارې د ناټو په ياده فوقالعاده غونډه کې ګډون او وينا وکړي.
د ناټو دې چارواکي ويلي، چې د دې سازمان غړي هېوادونو مشران دا فرصت لري، څو د اوکراين له ولسمشر ولاديمير زلينسکي څخه پر دغه هېواد د روسيې د بريد جريان په مستقيم ډول واوري.
له دې سره د اوکراين د ولسمشر وياند ويلي، چې ولسمشر زلينسکي به د ناټو په فوقالعاده غونډه کې د وينا پرمهال پر اوکراين د روسيې د بريد دفعه کولو په موخه د ناټو مرستې د جلبولو هڅه وکړي.
