رویداد خبري آژانس په افغانستان کې لومړنۍ دیجټلي خبري آژانس
د ملي دفاع وزارت چارواکي وايي، په افغانستان کې د يوې پياوړې اردو د رامنځته کولو په موخه کارونه لا هم دوام لري او زياتوي چې په يادو کارونو کې د پام وړ پرمختګ شوی دی.
د اسلامي امارت د ليکو د چاڼ رئيس او د ملي دفاع وزارت سر مفتيش لطفالله حکيمي چې پرون دوشنبه ناوخته د (کب په ۲مه) يې خبري کنفرانس ته خبرې کولې وويل، د ترتيب شوو اصولو له مخې به په نوې جوړېدونکې اردو کې د پخوانۍ اردو مسلکي افسران او سرتېري هم موجود وي.
نوموړي زياته کړه چې د پياوړې اردو د رامنځته کولو په موخه د ترسره شوو کارونو په ترڅ کې توانېدلي، چې د ۸۱ تخريب شوو چورلکو له ډلې نيمايي هغه يې بېرته ترميم شي. حکيمي زياته کړې چې دامهال ۳سوه زره سپکې، ۲۶زره درنې وسلې د اسلامي امارت په واک کې دي، چې په خبره يې کولی شي له دې وسلو په ګټنې د راتلونکې رادو پياوړتيا تضمين شي.
نوموړی داسې مهال د سپکو او درنو وسلو د ارقامو يادونه کوي چې د امريکايي چارواکو د ارزونو له مخې، په افغانستان کې د ۸۵ مېليارد ډالرو په ارزښت وسلې له امريکايي پوځيانو او د افغانستان له مخکيني پوځ څخه طالبانو ته پاتې شوي دي.
