رویداد خبري آژانس په افغانستان کې لومړنۍ دیجټلي خبري آژانس
په داسې حال کې چې په ملګرو ملتونو کې د افغانستان دايمي استازولۍ د څوکۍ پر سر ناندرۍ دوام لري، تازه د يادې استازولۍ سرپرست نصير احمد فايق خبر ورکړی چې نوموړي بېرته په ملګرو ملتونو کې د افغانستان د دايمي استازولۍ پر څوکۍ د سرپرست په توګه پاتې شوی دی.
نوموړي په دې اړ خپل ټوېټر کې تېره شپه د (سلواغې په ۲۶مه) ليکلي، ملګرو ملتونو دې سازمان ته د بهرنيو چارو مخکيني وزير محمد حنيف اتمر د هغه ليک مخالفت کړی، چې په کې يې ترې د نوموړي د لرې کېدو غوښتنه کړې وه.
فايق زياته کړې، هغه هڅې او توطيې چې په ملګرو ملتونو کې د افغانستان دايمي استازولۍ له سرپرستې د نوموړي د لرې کېدو او په ياد سازمان کې د افغانستان خلکو ته د عدالت غوښتنې غږ د چوپ کولو په موخه روانې وې، خنثی شوي دي.
نوموړي خبر ورکړی چې لا هم د سرپرست په توګه په ملګرو ملتونو کې د افغانستان دايمي استازولۍ چاري سمبالوي.
تېره اوونۍ د ملګرو ملتونو له عمومي منشي انتونيو ګوټيريش د افغانستان بهرنيو چارو مخکيني وزير محمد حنيف اتمر د يوه ليک په ترڅ کې غوښتي و، په داسې حال کې چې محمد ولي نعيمي د ملګرو ملتونو په سازمان کې د افغانستان استازولۍ مرستيال دی او اوس يې روغتيايي وضعيت ښه دی، د اصولو له مخې حق لري چې د دايميی استازي له استعفا وروسته په ياد سازمان کې د افغانستان د دايمي استازولۍ سرپرستي وکړي.
