رویداد خبري آژانس په افغانستان کې لومړنۍ دیجټلي خبري آژانس
د روغتيا نړيوال سازمان خبردادری ورکړی چې د کرونا وېروس اومېکرون بڼه د دېلتا هغې په پرته چټکه خورېږي او د دغه سازمان په خبره، که د دېلتا ترڅنګ د اومېکرون په چټکه توګه خورېدل هم دوام وکړي، نو د کرونايي سونامي د راپورته کېدو احتمال شته.
دا څرکندونې د روغتيا نړيوال سازمان رئيس تدروس ادهانوم ګبريسوس پرون چهارشنبه د (مرغومي په ۸مه) يوې انلاين غونډې ته کړي دي. نوموړي زياته کړې چې د کرونايي پېښو له زياتېدو سره د هېوادونو پر روغتيايي سيسټمونو فشار ښايي ډېر شي.
په داسې حال کې چې د ۱۹۲ هېوادونو له ډلې لا هم ۹۲ هېوادونو خپل وګړي تر ۴۰ سلنې د کووېډ۱۹ پر وړاندې نه دي واکسين کړي، د روغتيا نړيوال سازمان پر يادو هېوادونو غږ کړی چې تر راتلونکې جولای پورې بايد د خپلو وګړو ۷۰ سنله واکسين کړي.
کبريسوس زياته کړې چې دامهال د تېرې اوونۍ په پرتله په نړيواله کچه د کووېډ۱۹ پېښې ۱۱ سلنه زياتې شوي دي. د نوموړي د شمېرو له مخې له تېر اکټوبر راهيسې په اروپا کې د ټولو پېښو د نيمايي په اندازه ۳ سلنه، په امريکا کې ۳۹ سلنه او په افريقا کې بيا ۷ سلنه د کووېډ۱۹ پېښې په ترتيب سره زياتې شوي دي.
