رویداد خبري آژانس په افغانستان کې لومړنۍ دیجټلي خبري آژانس
د اسلامي امارت د رئيسالوزرا لومړي مرستيال ملا عبدالغني برادر نن يکشنبه د (لېندۍ په ۱۴مه) د خصوصي سکټور له استازو سره ليدلي او په ياده لېدنه کې د سوداګرو له لوري د سوداګرۍ پر وړاندې پرتې ستونزې بيان شوي.
په لېدنه کې د خصوصي سکټور له لوري په بانکي سیسټم، د پیسو په لېږد رالېږد او د سوداګرۍ په برخه کې پرتې ستونزې شریکې شوي او د يادو ستونزو د له منځه وړلو په موخه يې د حکومت له لوري پر بشپړه همکارۍ ټينګار کړی دی.
د خصوصي سکټور له استازو سره په دغه لېدنه کې د رئيسالوزرا لومړي مرستيال ملا برادر د سوداګرۍ اړوند ستونزو د حل په اړه د هر ډول لازمې همکارۍ ډاډ ورکړی.
نوموړی دغه راز د اسلامي امارت اړوندو ارګانونو ته لارښوونه وکړه چې د سوداګرو د ستونزو په حل کولو کې جدي اقدامات وکړي.
دا په داسې حال کې ده چې په بشپړه توګه د بانکي نظام نه فعالېدو له امله، ګڼ سوداګر شکايت کوي چې د پيسو په لېږد رالېږد کې له ستونزو سره مخ دي او دې چارې د اجناسو لېږد رالېږ هم له خنډ او ځنډ سره مخ کړی.
