رویداد خبري آژانس په افغانستان کې لومړنۍ دیجټلي خبري آژانس
د عراق وسلهوالو ځواکونو خبر ورکړی چې د دغه هېواد د لومړي وزير مصطفی الکاظمي پر کور د بېپيلوټه الوتکې بريد شوی، خو نوموړی له يادې پېښي ژوندی وتلی دی.
که څه هم تر اوسه د الکاظمي د ټپي کېدو په تړاو څه نه دي ويل شوي، خو روېټر خبري اژانس د نوموړي د ساتونکو په حواله خبر ورکړی چې په ياده پېښه کې د الکاظمي لږ تر لږه ۶ تنه ساتونکي ټپي شوي دي.
پېښه نن يکشنبه د (لړم په ۱۶مه) سهار مهال د عراق په پلازمېنه بغداد کې رامنځته شوې ده. له بريد وروسته مصطفی الکاظمي پر ټوېټر لېکلي چې رک روغ دی.
الکاظمي دغه راز له بريد وروسته په يوه لنډه ټلوېزيوني پيغام کې ويلي، چې ورته بزدلانه بريدونه نه وطن او نه هم راتلونکی جوړولی شي.
پر نوموړي دغه بريد داسې مهال کېږي چې د اګټوبر ۱۰ مې له پارلماني ټاکنو وروسته په دې هېواد کې پراخ لاريونونه پيل شوي. د لاريون رهبري کوونکې سياسي ډله چې په يادو پارلماني ټاکنو کې يې ماتې خوړلې، پر وسلو سمبال ده.
