رویداد خبري آژانس په افغانستان کې لومړنۍ دیجټلي خبري آژانس
د ژبې لکنت نړیواله ورځ هر کال د اکتوبر په ۲۲مه د عامه پوهاوي د لوړولو، د تبعیض د کمولو او د هغو ناسمو باورونو د اصلاح په موخه نمانځل کېږي چې د ژبې د بندښت لرونکو کسانو په اړه شتون لري.
د طبي معلوماتو له مخې، د ژبې لکنت يا بندښت د خبرو کولو د روانۍ یو اختلال دی چې د خبرو پر مهال د غږونو یا کلمو له غیرارادي تکرار، د غږونو له اوږدېدو او د خبرو له لنډمهاله بندېدو سره مل وي او دا حالت ډېری وخت په ماشومتوب کې پیلېږي او تر لویوالي پورې دوام کولی شي.
د دې ورځې د نمانځنې موخه د لکنت لرونکو کسانو د ځانباورۍ پیاوړتیا، د ټولنیز ملاتړ زیاتول او د خبرو کولو د بېلابېلو طریقو منل دي. متخصصان ټینګار کوي چې لکنت باید د ملنډو، تبعیض او ټولنیز انزوا لامل نه شي، بلکې له دغو کسانو سره باید د درناوي، زغم او همکارۍ له مخې چلند وشي، څو هغوی وکولی شي په ډاډه زړه خپل نظرونه څرګند او په ټولنه کې فعاله ونډه واخلي.
