رویداد خبري آژانس په افغانستان کې لومړنۍ دیجټلي خبري آژانس
په کابل ښار کې د جنایي جرمونو له ډېرېدو وروسته ولسمشرغني د کابل امنیتي مسئولیت د څو اوونیو لپاره خپل لومړي مرستیال امرالله صالح ته وسپاره.
د ولسمشر لومړي مرستیال امرالله صالح تېره شپه ناوخته پر خپله فېسبوک پاڼه لیکلي و، د ولسمشر د هدایت له مخې به سر له شنبې د کابل ښار امنیتي مسئولیت په غاړه واخلي.
نوموړي زیاته کړې:زه د خلکو د امنیت تامینولو لپاره د قانون د تطبیق په لار کې پخپل قاموس کې د جنایت کار پر وړاندې د ترحم او مصلحت هیڅ توری نه لرم.
نوموړي دغه راز ویلي، په کابل کې د لویو مجرمینو لېست چمتو شوی او له خلکو یې غوښتي چې له امنیتي ځواکونو سره مرسته وکړي.
صالح له خلکو د همکارۍ ډاډ غوښتی او دغه راز یې له خلکو غوښتنه کړې چې له هرې لارې کولی شي تر ده معلومات ور ورسوي.
د کابل امنیتي مسئولیت په داسې حال کې د ولسمشر لومړي مرستیال امرالله صالح ته سپارل کېږي چې له تېرو څو میاشتو را هیسي په مرکز کابل کې د جنایي جرمونو پېښې اوج ته رسېدلې او هره شپه د کابل ښاریان د وسلهوالو غلو له خوا ټپیان کېږي وژل کېږي پېسې او نور توکي ځیني اخیستل کېږي.
د یادونې ده چې تېره ورځ ولسمشرغني هم د کابل د امنیت پر خرابېدو اندېښنه ښودلې وه او زیاته کړې یې وه چې په نېږدې راتلونکي کې به په کابل ښار کې ۳۰۰ نورې امنیتي کامرې ولګول شي.
