رویداد خبري آژانس په افغانستان کې لومړنۍ دیجټلي خبري آژانس
اسپانیا کې مرستندویان وايي د دغه هېواد کناري ټاپو ګانو ته څېرمه اوبو کې د یوې ورکې شوې بېړۍ په لټون بوخت دي، چې تر ۲۰۰ ډېر کډوال یې لېږدول.
د دې بېړۍ په اړه ویل شوی چې پر تری تم کېدو یې له یوې اوونۍ ډېر وخت اوړي.
د واکېنګ بورډرز په نوم مرستندویه ډلې ویلي، د کب نیوونکې دې بېړۍ د سنیګال سویل کې له کافونټاین ساحلي ښاره حرکت کړی و.
د اسپانیا د افې خبري اژانس د رپوټ له مخې د دې بېړۍ په مساپرو کې ګڼ شمېر ماشومان هم دي.
رپوټونو کې ویل شوي چې دوه نورې ورته بېړۍ هم چې لسګونه کسان پکې سپاره دي، بې درکه شوې دي.
د اسپانیا سمندري مرستندویانو افې خبري اژانس ته ویلي چې د لټون دغو عملیاتو کې چورلکې هم مرسته کوي.
د دوو نورو بې درکه بېړیو په اړه ډېر جزییات نه دي خپاره شوي.
خو رویټرز خبري اژانس د واکېنګ بورډرز ډلې د یوې غړې ‘هلېنا مالېنو’ په حواله لیکلي چې له دوی په یوه بېړۍ کې ۶۰ او په بله کې ۶۵ کسان سپاره دي.
په دې توګه د دغو درېواړو ورکو شویو بېړیو د مساپرو ټول شمېر پر ۳۰۰ کسانو اوړي.
د مدیترانې سمندر کې د کډوالو د مړینې یوه ډېره مرګونې پېښه څو اوونۍ وړاندې هغه مهال رامنځته شوه چې د یونان سواحلو ته نږدې یې لېږدونکې بېړۍ ډوبه شوه.
دا په داسې حال کې ده چې په ۲۰۲۱ کال کې د دې خونړۍ لارې د قربانیانو شمېر ۱۱۲۶ کسانو ته رسېده.
