رویداد خبري آژانس په افغانستان کې لومړنۍ دیجټلي خبري آژانس
د اسلام ديني عالمانو نړيوالې ټولنې د کندز په يوه جومات کې پر لمونځ کوونکو شوې چاودنه غندلې او دا پېښه يې د ټولو شرعي اصولو خلاف عمل او جنايت بللی.
دې ټولنې نن يکشنبه د (تلې په ۱۸مه) په يوه خپره کړې اعلاميه کې ويلي، پر هر دول عبادت ځايونو چاودنې او بريدونه کول د سلامي اصولو خلاف دي او بايد وغندل شي.
د ديني عالمانو دې ټولنې په افغانستان او ټوله نړۍ کې د ورورۍ فضا په رامنخته کولو ټينګار کړی او زياته کړې يې ده چې په اسلامي نړۍ کې د تاوتريخوالي مخنيوي په موخه بايد له هر ډول نژادي او مذهبي توپير ډډه وشي.
د تېرې جمعې په ورځ د کندز ښار اړوند سېداباد کلي په يوه جامع جومات کې هغه مهال چاودنه وشوه چې، لمونځ کوونکې د جمعې لمانځه د ادا کولو په حال کې وو.
د ځايي چارواکو د مالوماتو له مخې، په دې چاودنه کې ۱۰۰ کسان شهيدان او له ۱۵۰ ډېر ټپيان شوې دي. دې چاودنې په نړيواله کچه پراخ غبرګونونه راپورته کړې او غير انساني عمل بلل شوی دی.
