رویداد خبري آژانس په افغانستان کې لومړنۍ دیجټلي خبري آژانس
په داسې حال کې چې د لوېديځ په شمول نړيوالو د افغانستان له سرپرست حکومت سره هر ډول تعامل د نوموړي حکومت پر سالم عمل پورې مشروط کړی؛ خو تازه قطري چارواکو له ط.البانو سره د نړيوالو په تعامل کې د جديت غوښتنه کړې ده.
د قطر بهرنيو چارو وزير محمد بن عبدالرحمن ال ثاني له فاينېنشل ټايمز ورځپاڼې سره په تازه مرکه کې د افغانستان پر موضوع تم شوی او ويلي يې دي، په اوس کې نړيوالو افغانستان ته شا کړې او يوازې په بشري برخه کې مرستې کوي، چې د نوموړي په خبره دا کار افغانستان له ستونزو او مشکيلاتو نه شي خلاصولی.
نوموړي ويلي، اړتيا ده چې لوېديځ هېوادونه په افغانستان کې اوسنیو سختو شرايطو ته په کتو د دې هېواد له سرپرست حکومت سره تعامل وکړي.
ال ثاني زياته کړې، که دا کار ونه شي نو نړۍ به په افغانستان کې د افراطيت پراخېدو او د اقتصادي ناورين د زياتېدو شاهده وي. نوموړي له افغانستان څخه د بهرنيو ځواکونو د وتلو موضوع هم ياده کړې او ويلي يې دي، چې د يادو ځواکونو له وتلو وړاندې بايد لوېديځ او امريکا له طالبانو سره يو پياوړی تعامل رامنځته کړی وی، څو د ال ثاني په خبره په افغانستان کې د طالبانو اوسنيو افراطي پرېکړو مخه پرې نيول شوې وی.
ال ثاني ټينګار کړی چې افغانستان ته د ځانګړې پاملرنې له لارې بايد اجازه ور نه کړل شي چې په دې هېواد کې وضعيت نور هم لا پسې خراب شي.
