رویداد خبري آژانس په افغانستان کې لومړنۍ دیجټلي خبري آژانس
د روسيې ټاس خبري اژانس د افغان سرچينو په حواله راپور ورکړی، چې د افغانستان سرپرست حکومت لوري مسکو کې د افغانستان سفارت يو برحاله ډيپلوماټ، د شارژدافېر په توګه ګمارل شوی دی.
په راپور کې ويل شوي چې نوموړی ډيپلوماټ جمال غروال نومېږي او د اسلامي امارت له لوري مسکو کې د افغانستان سفارت ته د شارژدافېر په توګه ټاکل شوی.
ټاس اژانس په خپل راپور کې زياته کړې، چې غروال به په نږدې ورځو کې په مسکو کې د افغانستان سفارت ټول مسووليت په غاړه واخلي او عملا به د شارژدافېر په توګه خپله دنده پيل کړي.
له دې څو ورځې وړاندې روسيې د افغانستان سرپرست حکومت له لوري يوه ورلېږل شوي ډيپلوماټ اعتبارنامه هم ومنله او دغلته يې د افغانستان په سفارت کې دنده پيل کړه.
دا په داسې حال کې ده چې پرون دوشنبه د بهرنيو چارو سرپرست وزير اميرخان متقي ويلي، چين هم ډاډ ورکړی چې په بيجينګ کې د افغانستان سفارت به د اسلامي امارت له لوري نوي ګمارل کېدونکي ډيپلوماټان ومني.
