رویداد خبري آژانس په افغانستان کې لومړنۍ دیجټلي خبري آژانس
د افغانستان د ملي دفاع وزارت وايي چې د لوی اختر په ورځو کې له طالبانو سره د اوربند پر مهال د ناامنیو پېښو په تړاو څیړنې کوي.
د دغه وزارت د ویاند مرستیال فواد امان د یکشنبې په ورځ د اګست په دویمه (زمري ۱۲) رسنیو سره په خبرو کې وویل چې له طالبانو سره د درې ورځني اوربند پر مهال د افغانستان په مختلفو سیمو کې د ناامنیو څو محدودې پېښې رامنځ ته شوي دي.
هغه زیاته کړه: “د افغانستان امنیتي او دفاعي ځواکونو د اوربند ټول اصول او قواعد رعایت کړي دي او همداشان اوربند ته پابنده او ژمن پاتې کېږي. د افغانستان خلک دا تمه له طالبانو څخه هم لري”.
ښاغلي امان دا څرګنده نه کړه چې د ناامنیو دغه پېښې په کومو ولایتونو کې او د چا له خوا رامنځ ته شوي دي.
پرون یکشنبه د افغان حکومت او طالبانو ترمنځ د موقت اوربند وروستۍ ورځ وه چې دواړو خواو له لوی اختر څخه مخکې پر یو بل د برید نه کولو اعلان کړی و.
د افغان حکومت او طالبانو له دغه اقدام څخه په ملي او نړیواله کچه پراخ هرکلی وشو.
د افغان حکومت او طالبانو ترمنځ د لوی اختر په درېیو ورځو کې اوربند په داسې حال کې شوی چې ټاکل شوې دواړه خواوې د بندیانو د خوشې کولوپروسې له بشپړېدو وروسته د سولې مخامخ خبرې پیل کړي.
