رویداد خبري آژانس په افغانستان کې لومړنۍ دیجټلي خبري آژانس
د افغان حکومت د مرکچي پلاوي درې غړي او د سولې په چارو کې د دولت وزير داسې مهال له دوحې بېرته کابل ته راستانه شوي چې د طالبانو سره خبرو تر دې مهاله کومه څرګنده پايله نه ده لرلې.
د افغانستان د ملي روغې جوړې عالي شورا منلې چې د مرکچي پلاوي درې غړي او د سولې په چارو کې د دولت وزير له دوحې بېرته کابل ته ستانه شوي دي.
فوزيه کوفي، کليمالله نقيبي او متين بېګ د مرکچي پلاوي هغه درې غړي دي چې د سولې په چارو کې د دولت له وزير سره يو ځای کابل ته راغلي دي.
خو د روغې جوړې عالي شورا ويلي، ياد کسان د يو شمېر شخصي ستونزو له کبله هېواد ته راستانه شوي او ټاکل شوې چې ډېر ژر بېرته دوحې ته ستانه شي.
د افغان حکومت او طالبانو تر منځ د سولې بينالافغاني خبرې د سپټمبر په ۱۲مه په دوحه کې پيل شوې، خو تر دې مهاله نه يوازې دا چې چندان پرمختګ نه لري، بلکې هېواد کې ورسره تاوتريخوالی لا ډېر شوی دی.
