رویداد خبري آژانس په افغانستان کې لومړنۍ دیجټلي خبري آژانس
د ازبکستان په پلازمېنه تاشکند کې د جرمني سفارت وايي، په افغانستان کې له سياسي بدلون وروسته يې زرګونه هغه افغانان د تاشکند هوايي دهليز له لارې جرمني ته لېږدولي، چې په بېړنۍ توګه يې خونديتوب ته اړتيا درلوده.
دې سفارت نن دوشنبه د (زمري په ۳۱مه) خپل ټوېټر کې ليکلي، د يادو افغانان شمېر ۵۳۴۷ تنه دی چې ازبکستان ته له رسېدو وروسته جرمني ته لېږدول شوي دي.
د نوموړي سفارت په خبره، جرمني ته د ازبکستان له لارې د ياد شمېر افغانانو د لېږدلو په پروسه کې، په کابل کې د تاشکند او تاشکند کې د کابل سفارت فعاله ونډه درلوده.
جرمني داسې مهال د ازبکستان له لارې د زرګونه افغانانو د لېږدولو خبر ورکوي، چې له دې وړاندې يې له ايران او پاکستان څخه هم د لسګونه زره افغانانو د لېږدولو خبره کړې.
د جرمني چارواکو په خبره، د يادو لېږدول شوو افغانانو په ډله کې ډېری هغه کسان شامل دي، چې په افغانستان کې يې د جرمني له ملکي او نظامي ماموريت سره همکاري کړې او يا هم په افغانستان کې له سياسي بدلون وروسته د مرګ له ګواښ سره مخ وو.
