رویداد خبري آژانس په افغانستان کې لومړنۍ دیجټلي خبري آژانس
د ملګرو ملتونو سرمنشي انټونيو ګوټريش يو وار بيا د افغانستان پر سرپرست حکومت غږ کړی، چې له شپږم ټولګي د پورته زدهکوونکو نجونو پرمخ دې د ښوونځيو دروازې پرانېزي.
نوموړي دا څرګندونې پرون دوشنبه ناوخته د (وږي په ۲۸مه) د ملګرو ملتونو له لوري د پوهنيز بدلون په سرمشريزه کې کړې دي. دې سرمشريزې ته د افغانستان د روباټيک ټيم مشره سميه فاروقي چې په افغانستان کې د دولسم ټولګي زدهکوونکې هم ده وربلل شوې وه.
نوموړې د خپلو خبرو په ترڅ کې وويل، چې دامهال د نجونو پر مخ متوسطې او لېسې دورو ښوونځي تړل شوي په دې توګه ميليونونه نجونې له نامالوم راتلونکي په وېره کې دي.
فاروقي زیاته کړې، چې طالبانو په بشپړه توګه د نجونو او ښځو موجوديت په ټولنه کې محوه کړی او ښايي زرګونه نجونې بيا ښوونځيو ته را نه شي؛ ځکه د نوموړې په خبره، د ښوونځي ګڼې زدهکوونکې نجونې وار له مخې واده شوې دي.
نوموړې وايي، چې د نجونو ښوونځو د پرانيستو په تړاو ټولې وعدې ماتې شوي او داسې هېڅ څرک نشته چې طالبان دې د نجونو ښوونځي پرانېزي.
فاروقي له نړيوالې ټولنې او په ځانګړې توګه له ملګرو ملتونو غوښتنه وکړه، چې په افغانستان کې د نجونو د زدهکړو د بېرته بيلېدو په اړه سملاسي اقدام وکړي.
له دې سره د ملګرو ملتونو سرمنشي انتونيو ګوټريش د ملګرو ملتونو د پوهنيز بدلون سرمشريزې ته د وينا پرمهال ټينګار وکړ، چې طالبان دې له توپير پرته د ټولو نجونو او هلکانو پرمخ ښوونځي پرانيزي.
نوموړي زياته کړې، چې د نجونو له لوري زدهکړې د سولې، امنيت اوا تلپاتې پراختيا لپاره بنسټيز ګام دی.
