رویداد خبري آژانس په افغانستان کې لومړنۍ دیجټلي خبري آژانس
د باختر اژانس له لوري د بهرنيو چارو سرپرست وزير اميرخان متقي هغه وېډيويي کليپ خپور شوی، چې نوموړی په کې له يو شمېر چينايي خبريالانو سره خبرې کوي.
په دې کليپ کې متقي ويلي، چين موافقه کړې چې په بيجينګ کې د افغانستان سفارت لپاره به نوي هغه ډيپلوماټان ومني، کوم چې د اسلامي امارت له لوري ورپېژندل کېږي.
يو شمېر نورو هېوادونو هم دغلته د افغانستان په مېشتو سفارتونو کې د طالبانو له لوري ورپېژندل شوي ډيپلوماټان منلي دي.
د اسلامي امارت له واک ته رسېدو لږ وروسته، په چين کې د افغانستان سفير جاوېد احمد قايم له دندې استعفا وکړه او خپلې شخصي ستونزې يې د يادې استعفا د لامل په توګه يادې کړې.
خو په وروستيو کې داسې راپورونه هم خپاره شوي وو، چې نوموړي په بيجينګ کې د افغانستان سفارت يوه طالب پلوه ډيپلوماټ ته ورسپارلی دی. د دې راپورونو په اړه اسلامي امارت او جاوېد احمد قايم څه نه دي ويلي.
