رویداد خبري آژانس په افغانستان کې لومړنۍ دیجټلي خبري آژانس
د اقتصاد وزارت معين او ناروې ته د تللي پلاوي غړی عبدالطيف نظري وايي، د اجنډا له مخې ټاکل شوې چې نن د امريکا له استازو سره د افغانستان پر اړوند مسايلو بحث او خبرې وشي.
نوموړي نن دوشنبه د (سلواغې په ۴مه) رسنيو ته ويلي، د افغانستان د شمتنۍ کنګل ساتلو له امله په هېواد کې بشري وضعيت ورځ تر بلې خرابېدونکی دی او زياتوي چې له امريکايي لوري سره په ګډ بحث کې به د افغانسان کنګل شوې شتمنۍ د بېرته ازادولو په اړه هم تمرکز وکړي.
نظري زياته کړې چې د شتمنۍ ترڅنګ به د دوحې هوکړې پر تطبيق هم خبرې وشي. د نوموړي په خبره اسلامي امارت له خپل اړخه د دوحې هوکړه پلې کړې؛ خو زياتوي چې امريکا بيا ياده هوکړه نقض کړې ده.
نظري څرګندوي چې د يادې هوکړې د مواردو پر بنسټ به، له امريکايي پلاوي سره له تور لېسټ د اسلامي امارت د رهبرۍ غړو د نومونو پر لرې کولو او دغه راز له افغانستان سره پر متقابل سياسي او اقتصادي تعامل هم بشپړ بحث وشي.
د ناورې په پلازمېنه اسلو کې د اسلامي امارت، امريکا او يو شمېر اروپايي هېوادونو ترمنځ دغه درې ورځنۍ خبرې پرون يکشنبه پيل شوې او سبا د سېشنبې تر ورځې به دوام وکړي.
