رویداد خبري آژانس په افغانستان کې لومړنۍ دیجټلي خبري آژانس
په ایران کې د حماس د سیاسی دفتر مشر، اسماعیل هنیه له وژل کېدو وروسته حماس پرون (سه شنبې، د زمري ۱۶مه) یحیی سنوار د هنیه ځایناستی ټاکلی دی.
بلخوا اسراییلو سنوار د اکتوبر د اوومې نېټې د برید پر طرحه کولو تورن کړی، هغه برید چې د غزې د جګړې د پيل لامل شو.
د سنوار په داسې حال کې د هنیه ځایناستی اعلان شوی، چې منځنی ختیځ له پراخه ګواښونو سره مخ دی، ځکه ایران د هنیه وژل د اسراییلو کار بولي او ګواښ یې کړی چې له اسراییلو به غچ اخلي.
په ورته وخت کې د ایران له ملاتړه برخمنې د لبنان حزبالله ډلې هم ګواښ کړی چې له اسراییلو څخه به د یادې ډلې د قومندان، فواد شکر غچ اخلي.
فواد شکر د هنیه له وژلو څو ساعته وړاندې د لبنان په پلازمېنه بېروت کې د اسراییلو په برید کې ووژل شو.
د حماس یو لوړپوړي چارواکي «فرانس پرس» خبري اژانس ته ویلي چې د سنوار ټاکنه دا ښيي چې هغوی خپل مقاومت ته دوام ورکړي.
د اسراییلو د بهرنیو چارو وزیر، یسراییل کاټز ویلي چې د سنوار ټاکل د حماس د ژر ورکولو لپاره یو قانع کوونکی دلیل دی.
