رویداد خبري آژانس په افغانستان کې لومړنۍ دیجټلي خبري آژانس
ګارډين ورځپاڼې په افغانستان کې د نجونو د زدهکړو په تړاو په خپل تازه راپور کې ويلي، که له شپږم ټولګي د نجونو پورته ښوونځيو بندښت همداسې دوام وکړي، نو په پوهنتونونو کې د نجونو پر ونډې به منفي اغيزې وکړي.
د ورځپاڼې د راپورو له مخې، که د نجونو ښوونځي تړلې پاتې شي، په راتلونکو کلونو کې به له ۱۲م ټولګي د فارغېدونکو جينکيو شمېر صفر او په دې توګه به نجونې پوهنتون ته د شاملېدو سند او اکاډميک ظرفيت ونه لري.
ګارډين د لوړو زدهکړو وزارت د وياند مولوي احمد تقي له قوله ويلي، چې د نجونو ښوونځيو بندښت کولی شي په راتلونکو کلونو کې پوهنتونونو ته د نجونو د ورتګ مخه ونيسي.
تقي زياته کړې، چې له ۱۲م ټولګي د نجونو نه فارغېدو په صورت کې، په خپله په پوهنتونونو کې د نجونو شمېر کمېږي او د څو کلونو په تېرېدو سره به پوهنتونونه نوې نجوني زدهکړيالانې ونه لري.
د تقي په خبره، د نجونو پر زدهکړو بنديز لنډمهالی دی او تمه لري چې د پوهنې وزارت به د يوې طرحې په وړاندې کولو سره د نجونو پر مخ بېرته ښوونځي پرانيزي.
خو ګارډين طالبانو ته د يوې نږدې سرچينې له قوله ويلي، که د نجونو پر مخ تر ۱۲م ټولګي ښوونځي خلاص هم شي، نو يوازې او يوازې د طب او ښوونې او روزنې په پوهنځيو کې زدهکړې وکولی شي.
ورځپاڼې د سرچينې دې خبرې په پام زياته کړې، چې دا کار د لوړو زدهکړو په برخه کې پر نجونو محدوديت دی او له کبله به يې يوازې په يادو دوو پوهنځيو کې ورته د زدهکړو اجازه وي او بس.
ورځپاڼې د ځينو پوهنتونونو د مسوولانو خبرې هم راخيستي او وايي، ياد مسوولان په هر پوهنځي کې د نجونو د زدهکړو لپاره ښه چاپيريال رامنځته کولی شي.
د پوهنتونونو مسوولانو په خبره، د نجونو ښوونځيو د بندښت او دغه راز د لوړو زدهکړو په برخه کې پر دوی د لګېدونکي محدوديت له امله ورېږي او په دې فکر کې دی، چې تر څو به نجونې له پامه غورځول کېږي؟
