رویداد خبري آژانس په افغانستان کې لومړنۍ دیجټلي خبري آژانس
۱. کله چې ورزش یا سخت فزیکي کار کوئ، مخ مو خولې کوي او بېلابېل میکروبونه او بکتریاګانې مو په مخ ناستې وي، که یې و نه وینځئ د مخ د داغونو او دانو لامل ګرځي. نو له ورزش یا سخت فزیکي کار څخه وروسته مو مخ حتماً ووینځئ.
۲. د ورځې په اوږدو کې انسان په آزاده هوا کې اوسي او مخ یې د هوا له ککړتیا څخه اغېزمن کیږي. که دغه مېکروبونه مو په مخ کې پاتې شي او ویده شئ، د مخ د داغونو او بخارونو لامل ګرځي. نو له ویده کېدو څخه مخکې مو مخ حتماً ووینځئ.
۳. ډېرې ګرمې اوبه مو د پوستکي دښمن دی. د نورو زیانونو تر څنګ د پوستکي د ښارښت لامل ګرځي. تل باید هڅه وشي، څو له معتدلو اوبو څخه د مخ د وینځلو لپاره ګټه واخیستل شي.
۴. مناسب او با کیفیته د مخ وینځونکي توکي (صابون، فیس واش… ) وکاروئ. البته د مخ د بڼې (غوړ والی، وچ والی او یا منځنی والی) ته په کتو سره دغه توکي راونیسئ (واخلئ).
۵. کله مو چې مخ وینځئ، د (۲۰ یا ۳۰) ثانیو پورې د مخ مږل بسنه کوي، ډېر مږل یې د مخ د ګونځونو او سوې لامل ګرځي.
۶. له وینځلو څخه وروسته مو مخ غوړ کړئ. د پوستکي ډاکټران په دې ټکي ډېر ټینګار کوي. ډېری خلک دا عادت نه لري او تل وچ مخ ګرځي. له وینځلو څخه وروسته د مخ غوړول، مخ مو روښانه، تازه، ځلېدونکی، او ځوان ښايي.
البته مخ باید هغه وخت غوړ شي، کله چې کور کې یاست، بیرون ته وتلو پر مهال د مخ غوړول ښه نه وي. ځکه غوړ مخ ډیر ژر د ګردونو او میکرونو ښکار ګرځي.
