رویداد خبري آژانس په افغانستان کې لومړنۍ دیجټلي خبري آژانس
د کورنیو چارو وزارت وايې د کندهار په دامان ولسوالۍ کې موټر بم چاودنه شوې.
د یاد وزارت ویاند طارق ارین وايي د کندهار د دامان ولسوالۍ پر امنیه قواندانۍ د موټر بم برید له امله ۱۱ پولیس ټپیان شوي دي.
موټر بم چاودنه شاوخوا لس نیمې بجې د ولسوالۍ د امنیه قوماندانۍ قرارګاه سره نږدې وشوه.
د کندهار ولایت د پولیسو ویاند جمال ناصر هم پیښه تاییده کړې او رسنیو ته یې ویلي چې په دې موټر بم برید کې ۱۱ پولیس برسیرن ټپیان شوي دي.
دغه برید د قوماندانۍ او ولسوالۍ ودانيو او ورته څېرمه کورونو ته یې هم زیان اړولی دی.
خو بل لور ته بیا د کندهار د والي ویاند بهیر احمد احمدي رسنیو ته وویل چې په دې پیښه کې د ولسوالۍ ۷ ملکي مامورین، ۲ د ملي امنیت سرتیري، ۹ پولیس او د یوې کورنۍ ۱۵ غړي ټپیان شوي دي.
وسلوالو طالبانو د دې پیښې په اړه تر اوسه څه نه دي ویلي.
