رویداد خبري آژانس په افغانستان کې لومړنۍ دیجټلي خبري آژانس
د استرالیا د کرېکټ لوبډله سویلي افریقا ته په سفر وتلې او د خپلو لوبو په لړ کې یې پرون ماښام د کوربه سویلي افریقا پر وړاندې د دې لړۍ لومړنۍ شل اوریزه لوبه ترسره کړه.
استرالیا په شل اوریزو لوبو کې د خپل نوي لوبډل مشر مایکل مارش په مشرۍ لوبغالي ته راغلې وه، چې د لوبې پچه سویلي افریقا وګټله او مارکرام سیالې لوبډلې ته یې د توپ وهنې بلنه ورکړه.
استرالیايي لوبغاړو په شل اورونو کې د ۶ لوبغاړو په سوځیدو سیالې لوبډلې ته د ۲۲۷ منډو هدف وټاکه. د توپ وهنې په برخه کې کپټان مایکل مارش ۹۲ ناسوځیدلې منډې او ټیم ډیویډ بیا ۶۴ منډې وکړې. د سویلي افریقا توپ اچونکیو ښه لوبه ونکړه او یوازې وتوانیدل، چې ۶ لوبغاړي وسوځوي.
سویلي افریقا ټاکل شوی هدف پوره کولو په موخه ډګر ته را ووتل، خو په چټکی سره یو په بل پسې سوځیدل. د سویلي افریقا ټوله لوبډله د ۱۱۵ منډو په جوړولو سره وسوځیدله او پیلییز توپ وهونکي ریضا هنډریکز وتوانید، چې ۵۶ منډې وکړي.
د استرالیا لوبډله وتوانیدله، چې په خورا لوی ټوپیر ۱۱۱ منډو سره لومړنی شل اوریزه لوبه وګټي او مایکل مارش د لوبې غوره لوبغاړی وټاکل شو.
ټاکل شوې، چې د دې لوبلړیو دویمه شل اوریزه لوبه د سپټمبر په اوله نیټه د سویلي افریقا په دوربن کې ترسره شي.
