رویداد خبري آژانس په افغانستان کې لومړنۍ دیجټلي خبري آژانس
حکومت خبر ورکړی، چې امنيتي ځواکونو پرون يکشنبه ناوخته د (غبرګولي په ۲۲مه) د کابل بګرامیو په ولسوالۍ مربوطاتو کې د داعش ډلې پر يوه پټنځي عمليات کړي.
د اسلامي امارت وياند ذبيحالله مجاهد په دې اړه خپل ټوېټر کې لېکلي، چې د يادو عملیاتو په ترڅ کې د یوسف په نوم د داعش ډلې يو مهم قوماندان وژل شوی او د محمد اغا په نامه د دې ډلې بل مهم غړی ژوندی نيول شوی دی.
مجاهد زياته کړې، ياد کسان د داعش ډلې اړوند د هغه ګروپ مهم غړي دي چې په کابل او ځینو نورو ولایتونو کې یې پر جوماتونو، خانقاوو او د برق پر پايو وروستيو بريدونو کې يې لاس درلود.
په کابل کې داسې مهال د داعش ډلې پر مرکز عمليات ترسره کېږي، چې امنيتي ځواکونو دوې ورځې وړاندې د تخار په تالقان ښار کې هم د يادې ډلې پر يوه مرکز عمليات کړي وو.
حکومت ويلي چې په تالقان ښار کې يې هم د يادو ترسره شوو عملياتو په ترڅ کې د داعش ډلې څو مهم او کليدي غړي وژلي دي.
