رویداد خبري آژانس په افغانستان کې لومړنۍ دیجټلي خبري آژانس
د ا.ا د ریاست الوزرا د اقتصادي مرستیال دفتر وايي، د کابل ښاروالۍ د خیرخانې د کوتل سړک د دویمې برخې، تر قصبې پورې د چهاراهي شهید د لومړۍ برخې او تر ګمرک پورې د هوايي ډګر سړک د جوړولو چارې د ۹۴۶ میلیونه افغانیو په لګښت پیل کړې دي.
د دې دفتر د خبرپاڼې له مخې، د دغو پروژو کار (شنبه، د ثور ۸مه) د ا.ا د ریاستالوزرا اقتصادي مرستیال، عبدالغني برادر په حضور کې پیل شوی دی.
په دې اعلامیه کې ویل شوي چې د خیرخانې کوتل دویم سړک د ۲ کیلو متر ۵۲۰ متره په اوږدوالي او د ۶۰ مترو په پلنوالي سره د ۳۶۴ میلیونه افغانیو په لګښت جوړېږي.
دغه راز تر قصبې د چهاراهي شهید سړک د یو کیلومتر ۸۹۰ مترو په اوږدوالي او ۴۵ متره په پلنوالي سره د ۱۷۵ میلیونه افغانیو په لګښت جوړېږي.
د ا.ا د ریاستالوزرا د اقتصادي مرستيال دفتر په اعلامیه کې دا هم ویل شوي چې تر ګمرک پورې د هوايي ډګر سړک د ٤٠٧ ميليونه افغانيو په لګښت د دوه کيلومتره ٧٩٤ مترو په اوږدوالي او ٦٠ متره په پلنوالي سره جوړېږي.
