رویداد خبري آژانس په افغانستان کې لومړنۍ دیجټلي خبري آژانس
د کونړ ولایت سیمه ییز چارواکي وايي،د پاکستان له خاورې یو ځل بیا د دغه ولایت پر شلتن ولسوالۍ ۲۹ توغندي را تغولي دي.
د کونړ د والي ویاند غني مصمم نن دوشنبه جولای۲۰(چنګاښ۳۰) یوې رسنۍ ته وویل چې له پرون ورځې راهیسې د ډیورنډ کرښې له پاکستاني غاړې د کونړ شلتن ولسوالۍ په چوګام او نورو سیمو ۲۹ توغندي ویشتل شوي دي.
نوموړی وايي، توغندي په شاړو ځمکو لګېدلي او د سر زیان یې نه دی اړولی.
د افغان چارواکو د معلوماتو په اساس پاکستاني ملېشو د تیرې جمعې په ورځ د کونړ د مرکز اسعد اباد په ګډون د مرورې او سرکاڼو ولسوالیو پر ځینو سمو هم راکټي بریدونه کړي و.
څو ورخې وړاندې د افغانستان د بهرنیو چارو وزارت ویلي و، چې په دغو بریدونو کې ۸ افغان ملکي وګړي وژل شوي او یو شمېر نور ټپیان شوي دي.
دغه وزارت همدارنګه زیاته کړې وه چې د یو بېړني دیپلوماتیک اقدام په ترڅ کې پر کونړ ولایت د پاکستان راکټي بریدونه بند شوي دي.
د افغانستان د بهرنیو چارو وزارت د تیرې شنبې په ورځ ویلي و چې د یادو راکټي بریدونو په اړه اندېښنه یې په کابل کې د پاکستان سفارت او د هغه هیواد د بهرنیو چارو له وزارت سره شریکه کړې ده.
پر همدې مهال د افغانستان د بشري حقونو کمېسیون پرون یکشنبه په یوې اعلامیې کې ویلي چې د دوی څېړنو له مخې د کونړ پر مرکز اسعد اباد او سرکاڼو ولسوالۍ پر ځينو سیمو د پاکستاني ځواکونو د توپچي (هاوان)۱۲ مرمۍ لګېدلو له کبله ۷ ملکي وګړي وژل شوي او ۸ نور ټپیان شوي دي
یاد کمېسیون ویلي چې په وژل شوو او ټپیانو کې ښځې او ماشومان هم شامل دي.
د افغانستان د بشري حقونو کمېسیون پر کونړ ولایت د پاکستاني پوځیانو لخوا د راکټونو راویشتل غندلي او په دې اړه یې د اندېښنې په ښودلو له افغان حکومت څخه د جدي اقدماتو غوښتنه کړې ده.
یاد کمېسیون ویلي چې تیر کال هم پر کونړ د پاکستاني پوځیانو په بریدونو کې ۸ ملکي وګړي وژل شوي و.
پاکستاني چارواکو تر دامهاله په دې اړه څه نه دي ویلي.
