د اروپا او د نړۍ ځینو نورو ښارونو کې د افغانستان د نجونو او ښځو د حقونو په ملاتړ لاریونونه وشول.
معترضانو لندن، فرانکفورټ، برلین، پاریس، نورنبرګ، بروکسل، واشنګټن او ځینو نورو ښارونو کې د افغانستان د ښځو وضعیت ته د نړیوالو د لا نور پام اړولو غوښتنه وکړه.
د غونډې ګډونوالو پر نړیوالې ټولنې غږ وکړ چې په عملي توګه دې د افغان ښځو ملاتړ وکړي. دوی د ا.ا په چارواکو غږ وکړ چې افغان ښځو ته د زده کړو او کار کولو اجازه ورکړي.
د ملګرو ملتونو امنیت شورا هم وړمه ورځ د تړلو دروازو ترشا خپله غونډه د ښځو وضعیت ارزولو ته ځانګړې کړې وه.