رویداد خبري آژانس په افغانستان کې لومړنۍ دیجټلي خبري آژانس
نړیوالو رسنیو خبر ورکړی چې په لویدیځه غاړه کې د اسراییلو په برید کې د حماس د یوه قوماندان په ګډون پنځه تنه وژل شوي دي.
رویټرز خبري اژانس نن (شنبه، د زمري ۱۳مه ) خبر ورکړی چې د اردن سیند په لویدیځه غاړه کې پر یوه موټر د اسراییلي الوتکو په برید کې د حماس د یوه قوماندان په ګډون پنځه تنه وژل شوي دي.
فلسطیني رسنیو هم د دغه راپور په تایید ویلي چې په دغه برید کې د حماس د پوځي څانګې د قدس د کنډک یو قومندان هیثم بلیدي او څلور تنه نور وژل شوي دي.
د دغو څلورو کسانو هویت نه دی په ډاګه شوی.
د اسراییلو پوځ په لویدیځه غاړه کې د طولکرم ښار په شاوخوا کې پر یوې وسله والې ډلې د هوايي برید پخلی کړی دی.
په تهران کې د اسماعیل هنیه له وژل کېدو او د لبنان د حزب الله د لوړپوړي قوماندان فواد شکر له وژل کېدو وروسته په منځني ختیځ کې کړکېچ زیات شوی دی.
