په دو ورځو کې تر ۵۵۰۰ ډېر کډوال ایټالیا ته رسېدلي دي

د ايټاليا حکومت د معلوماتو له مخې تېره اونۍ ۵۵۷۳ کډوال د دغه هېواد جنوبي ساحلونو ته رسېدلي دي. د شمېرو له مخې د جنورۍ میاشتې راهیسې په دغه هېواد کې شاوخوا ۲۷ زره کډوال راجستر شوي چې د تېر کال په پرتله کابو څلور چنده دي.

د مدیترانې لارې له زیاتو خطرونو سربيره هم ډېر کډوال اروپا ته د رسېدو لپاره له همدې لارې کار اخلي.
چارواکو ویلي دي چې یواځې په تېره اونۍ کې، یعنې د شنبې او یکشنبې پر ورځو ۵۵۷۳ کسان د ايټاليا جنوبي ساحل ته رسېدلي دي. له همدې امله د رسمي شمېرو له مخې، د جنورۍ له پيل راهيسې په دغه هېواد کې څه د پاسه ٢٧ زره نوي پناه غوښتونکي ثبت شوي دي، چې د تېر کال د همدې مودې په پرتله څلور برابره ډېر دي.
د دوشنبې په شپه د کب نیونکو یوه کښتۍ له شاوخوا ۶۵۰ کسانو سره د مدیترانې په سواحلو کې د دغه هیواد په جنوب کې د کالابریا سیمي ته ورسیده.