رویداد خبري آژانس په افغانستان کې لومړنۍ دیجټلي خبري آژانس
د ایران د بهرنیو چارو وزیر وايي، د افغانستان د ستونزو د حل لاره په دغه هېواد کې د ټولو قومونو په شتون سره د پراخ بنسټه حکومت جوړول دي.
حسین امیر عبداللهیان په لبنان کې له سیاسي او مذهبي ډلو سره په کتنې کې ویلي که څه هم تهران د افغانستان سرپرست حکومت په رسمیت نه دی پېژندلی، خو د خپلو ستونزو د حل لپاره يې د افغانستان له سرپرست حکومت سره اړیکې نیولې دي.
بل خوا ا.ا زیاتوي، د ګاونډیو په ګډون ټولو هېوادونو سره ښې اړیکې غواړي او دغه هېوادونه دې د افغانستان په کورنیو چارو کې له لاس وهنې ډډه وکړي.
د افغانستان سرپرست حکومت تر اوسه هېڅ هېواد په رسمیت نه دی پېژندلی، خو د روسيې، ایران، پاکستان، ترکيې او ځینو نورو هېوادونو په ګډون یو شمېر هېوادونه له ا.ا سره ډیپلوماټیکې اړیکې لري.
