رویداد خبري آژانس په افغانستان کې لومړنۍ دیجټلي خبري آژانس
د ایران ولسمشر، مسعود پزشکیان پرون (چهارشنبې، د تلې ۱۱مه) ویلي چې هېواد یې د جګړې په لټه کې نه دی، خو که اسراییل غچ اخیستونکي بریدونه وکړي، تهران به یې سخت ځواب ورکړي.
پزشکیان په دوحه کې د قطر له امیر «تیم بن حمد ال ثاني» سره په ګډه خبري غونډه کې ویلي: “اسراییل داسې جنایتونه ترسره کړي چې په تاریخ کې یې هیچا نه دي کړي او موږ مجبور یو چې ځواب ورکړو. موږ به یو قوي ځواب ورکړو او دا هغه څه دي چې اسلامي جمهوریت ورته ژمن دی.”
پزشکیان دا هم ویلي: “ایران د جګړې په لټه کې نه دی، بلکې دا اسراییل دی چې موږ دې ته اړ باسي چې غبرګون وښیو.”
بلخوا د ایران سپاهپاسدان اعلان کړی چې د تېرې سېشنبې په ورځ یې د حماس د مشر، اسماعیل هنیه، د حزب الله د مشر حسن نصرالله او د ایران د جنرال عباس نیلفروشان د وژلو په غچ کې توغندیز بریدونه کړي دي.
په ورته وخت کې د نړۍ ډېرو هېوادونو او ملګرو ملتونو له اسراییلو او ایران څخه غوښتي چې له زغمه کار واخلي.
