رویداد خبري آژانس په افغانستان کې لومړنۍ دیجټلي خبري آژانس
په افغانستان کې پر نجونو او ميرمنو سربېره پر رسنيو د محدوديتونو لګېدو په ترڅ کې، اسلامي امارت پرېکړه کړې چې د تلوېزيونونو په پرده راښکاره کېدونکې ښځينه وياندويانې دې هم مخ د ماسک په کارولو سره وپوښي.
په دې اړه له غبرګونو وروسته داسې راپورونه خپاره شول چې ګواکې د امري بامعروف او نهي عنالمنکر وزارت دغه پرېکړه بېرته اخيستې؛ خو نوموړي وزارت په يوه تازه بيان کې دا موضوع رد کړې ده.
د امربالمعروف او نهي عنالمنکر وزارت وياند عاکېف مهاجر ويلي، حکومت په دې برخه کې له کړې پرېکړې نه دی په شا شوی او په خبره يې د يادې پرېکړې عملي کول الزامي دي.
نوموړي زياته کړې، چې سر له نن شنبې د (غويي ۳۱مې) د ټلوېزيونونو په پرده راښکاره کېدونکې وياندويانې بايد له پرېکړې سره سم عمل وکړي او خپل مخونه د ماسک په کارولو سره وپوښي.
د اسلامي امارت دا پرېکړه له توندو غبرګونو سره مخ ده او له سرپرست حکومت غوښتل شوي چې پر ولس د فشار راوړلو پر ځای دې، د ولس پر مړولو تمرکز وکړي.
